Зварот з нагоды асьвячэньня палкавога сьцягу Палка імя Каліноўскага
![](https://www.radabnr.org/wp-content/uploads/2022/08/013e0000-0aff-0242-2cc9-08da7a422763_cx0_cy17_cw0_w408_r1_s.jpg)
9 жніўня 2022 г. у Вільні адбылося ўрачыстае асьвячэньне баявога сьцягу беларускага дабравольчага Палку імя Кастуся Каліноўскага, які ў складзе Збройных сілаў Украіны ўдзельнічае ў вайне супраць расейскіх акупантаў.
Сьцяг ад імя беларускага народу быў уручаны Радай БНР у асобе Сакратара Паліны Прысмаковай.
Старшыня Рады БНР Івонка Сурвілла выступіла з зваротам да байцоў Палка імя К. Каліноўскага, які быў зачытаны падчас цырымоніі:
“Вітаю вас, дарагія мае героі!
Я захопленая вашай адвагаю і вашай верай у найбольшую чалавечую каштоўнасьць, якой ёсьць Свабода.
Бароніце вы яе для ўсіх нас. Змагаецеся сёньня з самым лютым ворагам ня толькі Ўкраіны, але і беларускага народу. Гэты вораг – расейская імпэрыя, якая стагодзьдзямі зьнішчала імкненьне народаў да свабоды, да волі, да незалежнасьці. Пасьля ўсіх страшных бедаў, якія перажыло чалавецтва за мінулае стагодзьдзе, Расея зноў разьвязала крывавую вайну, імкнучыся рабаваць і забіваць сваіх суседзяў.
Ваш полк з гонарам нясе імя Кастуся Каліноўскага. Героя, які аддаў жыцьцё за Беларусь і запаліў у нашым народзе волю да свабоды, якую з тых часоў ужо нікому не атрымалася загасіць.
Для Рады БНР ёсьць вялікім гонарам уручыць вам баявы штандар і такім чынам выказаць вам удзячнасьць і блаславеньне ад беларускага народу, вольным голасам якога Рада Беларускай Народнай Рэспублікі зьяўляецца ўжо болей стагодзьдзя.
Малю Ўсёмагутнага за нашую агульную перамогу і каб апекаваўся кожным і кожнай з вас, пакуль ня вернемся ўсе разам у сваю родную Беларусь. Памажы вам Божа!
Жыве Беларусь!
Слава Украіне!”